ગુજરાતી સાહિત્યના વારસાનું ડિજિટલ સંવર્ધન

એકત્ર વેબસાઇટમાં નામ તેવા જ ગુણ છે. પણ આ બધું જેમતેમ એકઠું કરેલું નથી. શબરીના બોરની જેમ ચાખીને સજાવેલો વાચન વિચારનો ગુલદસ્તો છે. એક જગ્યાએ બેસીને જ વિશ્વભરના સર્જન સાથે સંવાદ થાય એવી જ્ઞાનની પરબ, કહો કે નદી છે એકત્ર. ગુજરાતી ભાષા અને નવી પેઢી માટે આ વેબસાઇટ એક પાઠશાળાથી કમ નથી !

~ જય વસાવડા

એકત્ર ફાઉન્ડેશન ડિજિટલ સાહિત્ય પ્રકાશન માટે આજના વિદ્યાર્થી, શોધક, અધ્યાપક અને સાહિત્ય રસિકજનો માટે ખૂબ મૂલ્યવાન પૂરવાર થઈ રહ્યું છે. કવિતા, નવલકથા, વાર્તા, વિવેચન, મધ્યકાળથી માંડીને લોકસાહિત્ય સુધી સાહિત્યનું એકત્રીકરણ કરવું કોઈ સહેલી વાત નથી. આ પ્રકારનું કાર્ય કરવું એ એક તપ છે. પરંપરાગત કવિ, સર્જકોથી માંડીને વર્તમાન સાહિત્યની ઝાંખી વેબસાઇટ પર ઝીલાય એ વિશિષ્ટ વાત છે. હરીફાઈના આ સમયમાં હરણફાળ ભરતો આજનો વિદ્યાર્થી અભ્યાસક્રમથી બહાર નીકળીને કંઈક વિશેષ પામવા ઈચ્છતો હોય તો તેને માટે એકત્ર ફાઉન્ડેશન સાહિત્યકોષ નીવડશે એમાં કોઈ નવાઈ નથી.

~ ડૉ. વર્ષા એલ. પ્રજાપતિ, લેખક અને અધ્યાપક

એકત્ર ફાઉન્ડેશનની વેબસાઈટ પર જે સાહિત્યધન મૂક્યું છે એ દરેક વિદ્યાર્થીને કોઈ ને કોઈ રીતે ઉપયોગી થાય છે. લાઇબ્રેરીના સેંકડો ઘોડા ફંફોસવા છતાં જે પુસ્તકો શોધ્યાં હાથ નથી આવતાં તે, એકત્ર પર એક ક્લિકે મળી જાય છે. ગુજરાતનાં કસબાઓ અને નાનાં શહેરોમાં રહીને અભ્યાસ કરતા વિદ્યાર્થીઓ માટે એકત્ર એક વિશાળ લાઇબ્રેરીની ખોટ પૂરે છે. મારું મોટા ભાગનું વાચન એકત્રની સખાવતથી થયું છે.

~ કલ્યાણ દેસાઈ, વિદ્યાર્થી-સંશોધક

એકત્ર ફાઉન્ડેશ એ મારા માટે જાણે ગમતા પુસ્તકાલયનો એક અંગત ખૂણો છે. શ્રેષ્ઠ સંપાદનો અને શ્રેષ્ઠ પુસ્તકોનો આ એક એવો ખુલ્લો ખજાનો છે જ્યાં ભાવકની કસોટી છે કે એ કેટલું પામી શકશે. ગુજરાતી ભાષા પાસે આવું એક રૂપાળું સરનામું હોય જ્યાં બે પેઢીના સર્જકો અને ભાવકો ભેગા થતા હોય એ વાત જ કેટલી દુર્લભ છે. એક વાચક તરીકે હું તમારો આભારી છું.

~ રામ મોરી, લોકપ્રિય યુવા લેખક

અંગત લાઇબ્રેરી ઠીકઠીક મોટી છે. પુસ્તક ભેટમાં મળે તો પ્રેમપૂર્વક સ્વીકારી લઉં છું, બાકી છેલ્લા બે વર્ષથી મારી પુસ્તક ખરીદીની પ્રક્રિયામાં આવેલી ઓટનું કારણ એકત્ર ફાઉન્ડેશનને જ ગણવું. હવે અહીં મને લગભગ બધાં સંદર્ભ અને માહિતી મળી રહે છે. એકત્ર ફાઉન્ડેશનના આ જ્ઞાનયજ્ઞનું ઋણ આપણે જેટલું ચૂકવીએ એટલું ઓછું છે.

~ મયૂર ખાવડુ